Os que nesta comarca xa peiteamos canas, mantemos vivo o recordo de infancia daquelas festas patronais onde a pirotecnia era un todo omnipresente, pois xa ao amencer espertábannos as salvas de rigor, para logo, ao fío do xantar dar paso ás intensas e explosivas tracas ás que puñan colofón o estrondo das bombas de palenque, e como broche final, entrada a media noite, sobre a pantalla dun ceo apagado despedía a xornada os resplandores de colorido variado dos fogos de artificio.
Eran tempos de cheiro a pólvora festiva, unha época de auxe dos afamados fogueteiros Cabrita e Millarengo, oficio que co paso do tempo, sen consumar extinción, foi minguado actividade para quedar nun referente testemuñal, por iso nesta situación de decadencia da profesión, parecía encomiable a garantía que representaba para a súa continuidade, a anunciada incorporación ao mundo da pirotecnia de Pepiño o Fogueteiro, ese lucense de Pas de Rei que publicamente decidiu tomar a testemuña para evitar o decaemento desta actividade tradicional.
Pois ben, de orixe este novo puntal na arte da faísca e a centella, despuntaba boas formas e supúñaselle unha revelación profesional no gremio da lucería e os explosivos, pero inesperadamente, deixou o seu madrileño campo da festa de San Isidro, para instalar os seus trastes profesionais ao interior deste cemiterio colectivo chamado Galicia, e aquí, de súpeto, en pleno enterro fai estalar os seus artefactos festivos,…….. a verdade que até asustouse o morto.!,……. pero moito máis os familiares e achegados do defunto que quedamos arrepiados.
Nos anos da miña vida, nunca tal cousa lémbrase, vir montar un alboroto pirotécnico nas exequias dun cortexo fúnebre!
Polo visto este fogueteiro de última xeración, debe ter metido na súas lixeirezas de cabeza, que os seus paisanos galegos, somos unha recua de nenos instalados no infantilismo crónico, cuxo conformismo aténdese autorizándolles a recollida das canaveiras dos seus dispositivos detonantes, sen caer na conta, que tal concepción mais que dunha persoa de rango ministerial, parece provir dun insensato estudante universitario que plantase a súa carreira incapaz de superar o primeiro de dereito; a non se que ambas cousas sexan o mesmo.
Sr. Blanco; é un sarcasmo e á vez unha pedantería que sexa vostede como socialista quen se proclama como “foguete” da economía galega, cando os gobernos do seu signo político (PSOE), incluído o seu, o único que fixeron coa nosa comunidade foi sumila na noite dos tempos, e todo iso, coa súa conivencia e a dos seus camaradas galegos nas cortes do estado, que lexislatura tras lexislatura, fixeron abandono do compromiso contraído co este país e os seus electores, e alternativamente apostaron por facer baza en prol das súas melloras crematísticas ..
Mire Vostede, a realidade non se altera con simulacros nin con xenialidades paranoicas, pois a unha sociedade afectada por reveses político – económicos, hai que darlle solucións efectivas e auténticas, e non entrar na estupidez de entronizar a vulgaridade como fórmula de resposta.
O escaso investimento que está a desenvolver o Ministerio de Fomento en territorio galego, en materia viaria e ferroviaria, é a repetición dun feito que ano tras ano o executivo estatal socialista ten deixado pendente ou deserto de consignación orzamentaria; por tanto, o fraccionamento a conta pingas dunha débeda histórica, non pode venderse cara á galería como un éxito de xestión, e moito menos, ter a pretensión de xustificar este escamoteo continuado na continxencia comparativa do plan investidor do goberno Autonómico
Ese método ademais de pouco ortodoxo, deixa ao descuberto que a sensatez non é o seu forte, de aí, que promova a súa aposta pola confusión; pero a torpeza e carencia argumental delátanlle cando rebaixando a intelixencia dos cidadáns, téntalles enganar con bagatelas dialécticas……. A verdade que o seu é decadente.!
Pero se a política investidora da esfera de competencias do Sr. Ministro no contexto xeral do marco territorial da comunidade é deplorable, se entramos nunha análise pormenorizada sobre os efectivos previstos para Ferrolterra, resulta cando menos insultante, pois o seu importe tradúcese nunha ridícula contía de 0,57€ por habitante ……..comprenderá Vostede que con semellante suma, poucos foguetes hanse botar, pero malo sexa que en correspondencia coa súa función non alcance para uns petardos.
De calquera xeito, se o que persegue na súa función de fogueteiro é lograr maior altura de lanzamento, admítame recoméndelle dúas localizacións perfectas, como son, a viga do pórtico de Astano en Fene, e a cúspide da cheminea de Endesa nas Pontes. Agora ben, se acepta esta suxestión non esqueza en vir acompañado da banda de gaitas de CCOO e UXT, pois así a festa quedará mais lucida.
Sen dúbida, o seu si é de traca..!
No hay comentarios:
Publicar un comentario